Katar 2022-de 3-nji aýlawyň duşuşyklaryna badalga berlip, 1/8 finalyň 2 duşuşygynyň garşydaşlary belli boldy. “A” toparçada Niderlandlaryň ýygyndysy ýer eýeleri Katary 2-0 hasabynda ýeňdi.
Niderlandlara ýeňiş getiren gollary 26-njy minutda Kodi Gakpo bilen 49-njy minutda Frenki de Ýong geçirdi.Bu ýeňişden soň Niderlandlar toparçada 1-nji orny eýeledi.Olar 9-njy gezek toparçadan çykmagy başardy. 11-nji gezek gatnaşýan Niderlandlaryň çykyş eden ilkinji 2 çempionatynda toparçalaýyn tapgyr ýokdy. Şunlukda, olar gatnaşan ähli ýaryşynda 1-nji toparçalaýyn tapgyrdan çykmagy başaran ilkinji ýygyndy hökmünde hasaba alyndy.
Toparçadaky beýleki oýunda bolsa çempionata şowly başlan Ekwador Afrika wekili Senegaldan 2-1 asgyn gelip, ýaryşdan çykdy. 44-nji minutda Ismail Sarryň penaltiden geçiren goly esasynda 1-0 öňe saýlanan Senegala 67-nji minutda Ekwador Kaisedonyň goly bilen jogap berdi.
Bu hasap ekwadorlylaryň 1/8 finala çykmagy üçin ýeterlikdi. Ýöne 70-nji minutda Senegalyň kapitany Kulibali toparyny öňe geçirdi we bu duşuşykdaky soňky gol boldy. Şeýlelikde, Senegalyň ýygyndysy 3-nji gezek gatnaşýan ýaryşynda 2002-nji ýyldan soň 2-nbji gezek 1/8 finala adyny ýazdyrdy.
Ekwadoryň ýygyndysy bolsa agza-burna gelen 1/8 finala çykmak mümkinçiligini elden giderdi.