Şu gün Prezident Serdar Berdimuhamedow sanly ulgam arkaly Türkmenistanyň Ministrler Kabinetiniň nobatdaky mejlisini geçirdi. Bu barada Watan habarlar gepleşiginde habar berildi.
Bellenilişi ýaly, mejlisde döwlet durmuşynyň ileri tutulýan meseleleriniň birnäçesine garaldy.
Hökümet mejlisinde, ilki bilen, milli parlamentiň ýolbaşçysy D.Gulmanowa söz berildi. Ol milli kanunçylyk ulgamyny döwrüň talaplaryna laýyklykda kämilleşdirmek boýunça alnyp barylýan işler barada maglumat berdi. Şunda täze kanun taslamalaryny taýýarlamak, hereket edýän birnäçe kanunlara degişli üýtgetmeleri we goşmaçalary girizmek boýunça alnyp barylýan işler, deputatlaryň gatnaşýan çäreleri, halkara derejede parlamentara gatnaşyklar barada hem aýdyldy.
Prezident Serdar Berdimuhamedow milli kanunçylyk ulgamyny döwrüň talaplaryna laýyklykda kämilleşdirmek boýunça işleri dowam etmegiň zerurdygyny belledi.
Şeýle hem döwlet Baştutany daşary ýurtlar bilen ýola goýlan parlamentara gatnaşyklary yzygiderli ösdürmegiň we berkitmegiň wajypdygyna ünsi çekdi.
Soňra wise-premýerler hem-de Türkmenistanyň Ministrler Kabinetiniň ýanyndaky Ulag we kommunikasiýalar agentliginiň Baş direktory gözegçilik edýän düzümlerinde alnyp barylýan işler, pudaklary mundan beýläk-de ösdürmek ugrunda durmuşa geçirilýän çäreler, ozal berlen tabşyryklaryň ýerine ýetirilişi, halkara gatnaşyklar, ýurduň daşary syýasaty, degişli ugurlar boýunça öňde boljak çäreler, olara görülýän taýýarlyk işleri barada hasabatlary berdiler.
Döwlet Baştutany hasabatlary diňläp, ýurduň dürli toplumlarynda, milli ykdysadyýetiň pudaklarynda alnyp barylýan işler, halkara gatnaşyklar, öňde boljak çäreler, pudaklary mundan beýläk-de ösdürmek ugrundaky wezipeler bilen baglylykda, degişli ýolbaşçylara anyk tabşyryklarydyr görkezmeleri berdi.
Prezident Serdar Berdimuhamedow Hökümet mejlisiniň barşynda Türkmenistanyň Garaşsyzlygynyň 33 ýyllygyna taýýarlyk görmek we ony ýokary guramaçylyk derejesinde bellemek bilen bagly degişli Karara hem gol çekdi.
Mejlisde döwlet durmuşyna degişli başga-da birnäçe möhüm meselelere garaldy we olar boýunça degişli çözgütler kabul edildi.