Ýeňil agram derejesinde UFC-niň çempiony Alžemeýn Sterlingiň guşagyny goramak üçin geçirjek tutluşygy barada maglumatlar paýlaşyldy.
Amerikaly çempion sentýabr aýynda geçiriljek UFC 279 ýaryşynda tutluşyk geçirer. 32 ýaşly Sterling (21-3 MMA, 13-3 UFC) 36 ýaşly watandaşy Ti Jeý Dillaşou (17-4 MMA, 13-4 UFC) bilen tutluşar.
UFC 279 ýaryşyny 11-nji sentýabrda geçirmek meýilleşdirilýär. Mälim edilişi ýaly, iki tarap hem degişli şertnama gol çekdi. Düzüminde garaşylýan tutluşyk hem boljak ýaryşy kabul etmek üçin Boston we Atlanta şäherleri dalaş edýär.
Sterlingiň 7 tutluşykdan bäri ýeňiş gazanyp gelýändigini ýatladýarys. Bu ýeňişleriň ikisi Petr Ýan bilen bolan tutluşyklarda gazanylypdy. Dillaşou bolsa soňky tutluşygyny geçen ýylyň iýul aýynda geçirip, onda Kori Sendhageni ýeňdi.