Gepleşigimiziň bu sanynda Türki döwletleriň gün tertibindäki möhüm wakalar hakynda durup geçmek isleýäris.
2023-nji ýylyň 14-nji noýabrynda Samarkand şäherinde Özbegistan-Türkiýe 2-nji Bilim forumy geçirildi. Foruma Özbegistanyň Ylym, bilim we innowasiýalar ministri Adil Abdurahmanow we Türkiýäniň Ýokary bilim guramasynyň başlygy Professor Dr.Erol Özwar, iki ýurduň ýokary okuw jaýlarynyň rektorlary bilen prorektorlary gatnaşdylar.
14-nji noýabrda Gazagystanyň ilatynyň 20 milliona ýetendigi beýan edildi.
Üstümizdäki aýyn 16-17-si aralygynda Bişkek şäherinde Garaşsyz döwletleriň arkalaşygyna girýän ýurtlaryň Parlament Assambleýasynyň 56-njy sessiýasy geçirildi.Sessiýa Azerbaýjanyň, Ermenistanyň, Belarusyň, Gazagystanyň, Gyrgyzstanyň, Russiýanyň, Özbegistanyň we Täjigistanyň mejlisleriniň başlyklary bilen halk deputatlary gatnaşdylar.
Sessiýanyň çäginde Gyrgyzstanyň Ýokarky geňeşiniň 85 ýyllygyna we Çingiz Aýtmatowyň doglan gününiň 95-nji ýyllygy mynasybetli halkara maslahatlar geçirildi. Çingiz Aýtmatowyň doglan gününiň 95 ýyllygyna bagyşlanan çärä Türkiýeden uly wekiliýet gatnaşdy.
Gyrgyz Respublikasynyň Prezidenti Sadyr Japarow 2023-nji ýylyň 17-nji noýabrynda Ýaponiýa resmi sapar gurady. Prezident Japarow Ýaponiýada Imperator Naruhito, Ýaponiýanyň Premýer-ministri Fumiýo Kişida we Mejlisiň Başlygy Fukusiro Nukaga bilen duşuşyklar geçirdi. Prezident Japarow şeýle hem Ýaponiýanyň käbir edaradyr guramalarynyň ýolbaşçylary, işewür adamlary bilen duşuşdy.
17-nji noýabrda Russiýanyň Daşary işler ministri Sergeý Lawrow Merkezi Aziýa ýurtlarynyň Moskwadaky ilçileri bilen duşuşdy. Duşuşykda Russiýa+Merkezi Aziýa gatnaşyklary hakynda pikir alyşyldy.
Geçen hepde Demirgazyk Kipr Türk Respublikasynyň döredilen gününiň 40 ýyllygy bellenilip geçildi. Türk goşunlarynyň Azerbaýjandaky iş möhleti bir ýyl uzaldyldy. Türkiýäniň we Azerbaýjanyň Medeniýet ministrleri 13-nji noýabrda medeni hyzmatdaşlyk boýunça hyzmatdaşlyk şertnamasyna gol çekişdiler.
2023-nji ýylyň 13-nji noýabrynda Azerbaýjanyň Prezident Ilham Aliýew Ýewropada howpsuzlyk we hyzmatdaşlyk guramasynyň Parlamentariler Assambleýasynyň Başlygy Pia Kaumany kabul etdi. Duşuşykda Günorta Kawkazdaky ýagdaý, Azerbaýjan-Ermenistan gatnaşyklary hakynda pikir alyşyldy.
14-nji noýabrda Azerbaýjanyň Prezidenti Ilham Aliýew Özbegistanyň Maýa goýum, senagat we söwda ministri Laziz Kudratowy kabul etdi. Duşuşykda ulaglar, söwda, senagat ugurarynda Azerbaýjan-Özbegistan gatnaşyklary seljerildi.
15-nji noýabrda Bakuwda Türki dünýäniň 2-nji Meteorologiýa forumy geçirildi. Foruma Türki döwletleriň guramasyna agza ýurtlaryň degişli ministrleri gatnaşdylar. Şol gün Azerbaýjanyň Premýer-ministri Ali Asadow forum mynasybetli Bakuwa baran Türkiýäniň Daşarky gurşawy goramak, şähergurlyşygy we howanyň üýtgemegi miistri Mehmet Özhasekini kabul etdi.
15-nji noýabrda Wengriýa bilen Russiýanyň ýadro energiýa bekediniň gurluşygy boýunça ylalaşandyklary beýan edildi. Rosatomyň Wengriýada gurjak Paks-2 ýadro energiýa bekedi 2030-njy ýylda ulanmaga beriler. Taslamanyň gymmaty 12,5 milliard ýewro barabar.