Türkmen wekiliýeti 17-nji martda Russiýa Federasiýasynyň Moskwa şäherinde geçiriljek Garaşsyz Döwletleriň Arkalaşygynyň Ykdysady geňeşiniň nobatdaky mejlisine hem-de Integrasiýa gepleşikleri: GDA, ÝYHG, ŞHG, BRIKS atly GDA-a agza ýurtlaryň XV Halkara ykdysady forumyna gatnaşar. Bu çärelere gatnaşjak türkmen wekiliýetine Türkmenistanyň Ministrler Kabinetiniň Başlygynyň orunbasary H.Geldimyradow ýolbaşçylyk eder.
Forumyň resmi saýtynda habar berlişi ýaly, nobatdaky mejlis GDA-nyň Ýerine ýetiriji komitetiniň goldaw bermeginde GDA-nyň ykdysady ösüşi üçin işewürlik merkezi birleşigi tarapyndan guralýar we GDA agza ýurtlaryň degişli döwlet düzümleriniň gatnaşmagynda işewürlik meselelerini ara alyp maslahatlaşmak üçin möhüm ähmiýetli her ýyllyk platforma bolup durýar.
Forumyň wezipesi bilelikdäki kararlary kabul etmekden, özara hyzmatdaşlygy ösdürmekden, gatnaşyjylaryň gyzyklanmalaryny kesgitlemekden, uzak möhletleýin hyzmatdaşlygy ýola goýmakdan, pikir alyşmakdan we Arkalaşygyň ykdysady ösüşine tarap ädimleri meýilleşdirmekden ybaratdyr.
Dünýädäki çylşyrymly geosyýasy we ykdysady ýagdaýlaryň netijesinde, GDA ýurtlarynyň ÝYHG, ŞHG we BRIKS guramalaryna agza ýurtlar bilen hyzmatdaşlygy has derwaýys häsiýete eýe boldy.
Foruma GDA ýurtlarynyň Premýer-ministrleriniň orunbasarlary (GDA-nyň Ykdysady geňeşiniň agzalary) ykdysady ösüş, maliýe, senagat we söwda ministrlikleriniň ýokary derejeli işgärleri, häkimiýetleriň, söwda we senagat edaralarynyň hem-de GDA agza döwletleriň telekeçileri gatnaşarlar.
Forumyň gün tertibi maliýe, senagat, saglygy goraýyş, ulag-logistika, ýaşyl ykdysadyýet we beýleki ugurlar boýunça pikir alyşmalary özünde jemleýär. Mundan başga-da, aýratyn ugurlar boýunça mejlisler, tegelek stol gepleşikleri hem-de foruma gatnaşyjylaryň taslamalarynyň sergisi geçiriler.