Ýakynda tamamlanan ýurdumyzyň futbol çempionatynyň dowamynda dürli toparlara wekilçilik edýän futbolçylaryň 100-si netijeli urgy geçirmegi başardy. Futbolçylaryň bäşisi bolsa topy öz derwezelerinden geçirdiler.
Çempionatyň dowamynda oň köp gol geçiren oýunçylaryň sanawynda netijeli urgularyň 35-sini (5-si 11 m.u.) öz adyna ýazdyran Altymyrat Annadurdyýew öňdeligi eýeledi.Bu hüjümçiniň 2018-nji ýylda hem bu ugurda öňe saýlanandygyny bellemek gerek.
Bu sanawda ilkinji bäşligi şu oýunçylar düzdüler: Yhlas Magtymow (16 top; 3-si 11 m.u.), Elman Tagaýew (16 top; 5-si 11 m.u.), Mihail Titow (13 top), Murat Ýakşiýew (11 top).
28-nji gezek geçirilen Türkmenistanyň futbol çempionatynda paýtagtymyzyň “Altyn Asyr” toparynyň 7-nji çempionlygyny gazanandygyny ýatladýarys. “Altyn Asyr” geçiren duşuşyklarynda 73 utuk toplady. Çempionatyň jemi boýunça “Ahal” ikinji (55 utuk), “Şagadam” (47 utuk) bolsa üçünji orunlara mynasyp bolupdy.