Ýakynda 2005 — 2007-nji ýyllarda doglan ýetginjekleriň arasynda taýboks boýunça Türkmenistanyň kubogy ugrunda ýaryş guraldy. Ýaryş Mary welaýatynyň Mary şäheriniň 4-nji sport mekdebinde geçirildi.
Oglanlaryň 42 kilogram agramdaky ýaryşynda Aşgabatdan Agaşöhrat Agahalylow (tälimçisi Babanazar Şiriýew), 45 kilogramda Mary welaýatyndan Kerwen Berdiliýew (tälimçisi Mekan Durdyýew), 48 kilogramda hem şol sebitden Şaperman Kuwwatgeldiýew (tälimçisi Babanazar Şiriýew) hormat münberiniň iň ýokarky basgançagyna çykdylar.
Mundan başga-da, 51 hem-de 54 kilogram agram derejelerinde maryly taýboksçylar Umyt Ahmedow bilen Muhammetgeldi Agajanow (ikisiniň hem tälimçisi Mekan Durdyýew) ýeňiji boldular. 57 kilogramda aşgabatly Ybraýym Bäşimow (Tälimçisi Orazmuhammet Bäşimow), 60 kilogramda Mary welaýatyndan Gadam Aşyrgulyýew, 63,5 kilogramda şol welaýatdan Kerwen Muhammetöwezow (ikisiniň hem tälimçisi Mekan Durdyýew) garşydaşlarynyň ählisinden rüstem çykdylar.
67 hem-de 71 kilogramda paýtagtly türgenler Emir Söýünow (Tälimçisi Orazmuhammet Bäşimow) bilen Emirhajy Hajyýew (tälimçisi Tirkiş Döwletow) ýeňiş gazansalar, Daşoguzdan Şöhrat Maksadow (Tälimçisi Gurban Saparmyradow) 75 kilogramda, Aşgabatdan Resul Ilamanow (tälimçisi Tirkiş Döwletow) 75 kilogramdan ýokary agramda ýeňijiler hökmünde bellige alyndylar.
Gyzlardan maryly türgenler Aýşat Jomardowa hem-de Aýçeşme Joraýewa (ikisiniň hem tälimçisi Begmyrat Amanow) 45 we 48 kg agram derejelerinde, Ahaldan Bibimerýem Akmuhammedowa (tälimçisi Akmuhammet Beghanow) 51 kilogramda, Lebapdan Mährijemal Eýemberdiýewa bilen Nurjahan Rahymowa (ikisiniň-de tälimçisi Anwarjan Kurbanow) 54 hem-de 57 kilogramda birinji orna eýe boldular.
Lebaply Gülälek Çaryýewa (Tälimçisi Anwarjan Kurbanow) 60 kilogramda tapawutlansa, balkanly Kseniýa Salowýowa (tälimçisi Ruslan Kurbanow) 75 kilogramda Türkmenistanyň Kubogy ugrundaky ýaryşy ýeňiş bilen jemlediler.
29-njy dekabrda tamamlanan ýaryşda ýer eýeleriniň — Mary welaýatynyň topary umumy hasapda öňdeligi elden bermedi. Aşgabat şäheri ikinji orny eýelese, üçünji orny gazanmak Lebap welaýatynyň toparyna miýesser etdi.