Britaniýanyň Premýer-ministri Boris Jonson G7-ä girýän ýurtlaryň 2022-nji ýylyň ahyryna çenli ýoksul ýurtlara jemi 1 milliard doza koronawirus sanjymyny bermegi meýilleşdirýändigini beýan etdi.
Britaniýanyň hökümetinden berilen beýannamada: “Britaniýanyň sanjym maksatnamasynyň üstünliginiň netijesinde artykmaç sanjymlarymyzy isleg bildirýän ýurtlara bereris. Ol pandemiýany doly ýeňmek üçin möhüm başlangyç bolar” diýilýär.
Beýannamada Jonsonyň G7-niň liderleriniň ýoksul ýurtlara jemi 1 milliard doza koronawirus sanjymyny bermegine garaşýandygy nygtaldy.
Britaniýanyň birinji tapgyrda artykmaç bolan 100 million doza Kovid-19 sanjymyny berjekdigi habar berildi.
G7-ä girýän ýurtlaryň liderleri pandemiýanyň başlamagyndan bäri ilkinji gezek Galleriň Kornwalldaky Karbis aýlagynda şu gün öz işine başlan we 13-nji iýuna çenli dowam etjek sammitde duşuşdylar.
Sammitde dowam edýän pandemiýa, global geosyýasy howplar we howa çalşygy ýaly möhüm meseleler seljeriler.
Britaniýanyň Premýer-ministri Boris Jonsonyň başlyklyk edýän sammitine Kanadanyň Premýer-ministri Jastin Trýuda, Fransiýanyň Prezidenti Makron, Germaniýanyň Federal Kansleri Merkel, Italiýanyň Premýer-ministri Dragi, Ýaponiýanyň Premýer-ministri Suga, ABŞ-nyň Prezidenti Baýden, ÝB Komissiýasynyň Başlygy Leýen we Ýewropa Geňeşiniň Başlygy Mişel gatnaşýar.
Sammite Awsstraliýanyň Premýer-ministri Skott Morrison, Koreýa Respubližasynyň Prezidenti Mun Jin, Günorta Afrikanyň Prezidenti Ramaphosa we Hindistanyň Premýer-ministri Modi myhman ýurtlaryň liderleri hökmünde çagyryldy.