Şu gün, 27-nji ýanwarda Kuala-Lumpur şäherinde AFK-nyň Kubogynyň toparçalaýyn bäsleşiginiň bije çekişlik dabarasy geçirildi.
Onuň netijesinde Türkmenistanyň futbol çempionatynyň ýeňijisi “Altyn Asyr” bilen kümüş medalyň eýesi “Ahal” toparlary öz garşydaşlaryny bildiler.
Ýurdumyzyň çempiony hem-de Kubogynyň eýesi “Altyn Asyr” topary “F” toparçada Özbegistanyň futbol çempionatyny üçünji hatarda tamamlan AGMK (ýa-da “Nasaf”), Täjigistanyň futbol birinjiliginiň kümüş medalynyň eýesi “Hojand” hem-de Gyrgyz Respublikasynyň çempionatyny ikinji hatarda tamamlan “Alaý” toparlary bilen bäsleşer.
“E” toparça düşen “Ahal” toparynyň garşydaşlary Täjigistanyň Kubok bäsleşiginiň ýeňijisi “Rawşan” hem-de Gyrgyz Respublikasynyň çempiony “Dordoý” toparlary bolarlar.
AFK-nyň Kubogy 2021-iň toparçalaýyn bäsleşigi 14-20-nji maý aralygynda merkezleşdirilen görnüşde geçiriler. Toparçalaryň ýeňijileri sebitleýin finalda duşuşmaga mümkinçilik alarlar. Iki oýundan ybarat bolan final duşuşygy 11-25-nji awgustda geçiriler.
Ýeri gelende bellesek, saýlama tapgyryna gatnaşýan AGMK topary AFK-nyň çempionlar ligasynyň toparçalaýyn bäsleşigine düşen ýagdaýynda, onda AFK-nyň Kubogynyň toparçalaýyn bäsleşiginde onuň ornuny Özbegistanyň futbol çempionatynyň kümüş medalynyň eýesi “Nasaf” topary eýelär.
AFK-nyň Kubogy - 2021
Merkezi sebit
“Е” toparça:
“Rawşan” (Täjigistan)
“Dordoý” (Gyrgyz Respublikasy)
“AHAL” (TÜRKMENISTAN)
“F” toparça:
AGMK (ýa-da “Nasaf”, Özbegistan)
“ALTYN ASYR” (TÜRKMENISTAN)
“Hojand” (Täjigistan)
“Alaý” (Gyrgyz Respublikasy)