Altyn asyr çempionlyk ugrundaky esasy bäsdeşi bolan Ahalyň güýçli futbolçylarynyň birini ― goragçy Güýçmyrat Annagulyýewi düzümine goşdy. Bu barada Türkmenistanyň Futbol federasiýasy resmi ýagdaýda habar berdi.
24 ýaşly goragçy karýerasynda Ahaldan başga-da Nebitçi we Aşgabat futbol toparlarynda hem çykyş etdi. Geçen möwsümde bolsa Ahalyň düzüminde Ýokary liganyň, Türkmenistanyň kubogynyň we Naýbaşy kubogyň duşuşyklaryna gatnaşdy. Üç ýaryşda 26 duşuşyga gatnaşan goragçy şolarda 2300 minutdan gowrak wagt meýdanda boldy.
2018, 2019-njy ýyllarda Ahal bilen AFK-nyň kubogy ugrundaky duşuşyklara hem gatnaşan futbolçy ýurdumyzyň milli ýygyndysynda dört duşuşyk geçirdi. Şol sanda 2019-njy ýylda BAE-de geçirilen Aziýanyň kubogyna hem gatnaşdy.