Dortmundyň Borussiýa futbol klubunyň metbugat gullugy Edin Terziçiň baş tälimçilikden boşadylandygyny yglan etdi.
Habarda bellenilişine görä, tälimçiniň özi işden gitmek barada arza beripdir hem-de onuň islegi toparyň ýolbaşçylary tarapyndan kanagatlandyrylypdyr.
41 ýaşly hünärmen Edin Terziç 2022-nji ýylyň maýyndan bäri Borussiýanyň baş tälimçisi bolup işläp gelýärdi. Onuň topar bilen şertnamasy 2025-nji ýylyň tomsuna çenli niýetlenendi. Mundan başga-da, ol 2010 — 2013-nji ýyllaryň aralygynda hem-de 2018-nj ýyldan häzirki wagta çenli toparyň ulgamynda işläp gelýärdi. Ol klubuň ýaşlar toparlaryny türgenleşdirdi hem-de tälimçiler ştabynda zähmet çekdi.
Şeýle-de ol dürli ýyllarda Angliýanyň West Hem hem-de Türkiýäniň Beşiktaş toparlaryna hem tälimçilik etdi.
Ýeri gelende bellesek, tamamlanan möwsümde Borussiýa ÝÇL-iň finalyna çykmagy başardy hem-de ýaryşyň aýgytlaýjy oýnunda Ispaniýanyň Realyndan 2:0 hasabynda asgyn geldi. Topar geçen möwsümde Bundesligada bäşinji orny eýeledi. 2022/23-nji ýyllaryň möwsüminde bolsa Borussiýa Bundesliganyň kümüş medalyna eýe çykypdy.