Türkiyäniň Iç Anadoly sebitiniň taryhy şäherleriniň biri bolan Kaýseri şäherinden adyny alyp gaýdýan Kaýseri Basdyrmasy Kaýseriniň Söwda palatasynyň ýüz tutmagy netijesinde 2000-nji ýylda Türkiyäniň Geografiki taýdan hasaba alynan önümleriniň arasyna goşuldy.
Çarwa jemgyýetlerinde etiň kakadylyp, uzak wagtlap saklanmagy pikirinden gözbaş alyp gaýdýan we häzirki günümize çenli gelip ýeten Kaýseri Basdyrmasy 2-5 ýaş aralygynda we azyndan 250 kg agyrylygynda erkek bolan iri şahly mallaryň arka, bud we gol bölümlerinden alynan uly et bölekleriniň duzlamak, ýuwmak, basdyrmak we guratmak işlerinden geçirilip, çemen diýip atlandyrylýan ýörite sous bilen gaplanmagy bilen öndürilýär.
Çemen atly sousyň düzüminde pomidor we burç goýutmasy, sarymsak, bugdaý uny, suw we tapawutly hoş bos ysly otlar bar.
Tekiz görnüşde öndürilýän Kaýseri Basdyrmasynyň önümçiliginde etleriň içi we daşy duzlanýar.
Dört gün saklanýan etleriň suwy sykylanyndan soň, üstündäki duzlar dolulygyna aýrylýança çenli ýuwulýar we 7 günüň dowamynda demir asgyçlarda saklanýar.
Ondan soň ýörite enjamlar bilen basdyrylýan we tekiz görnüşe getirilýän et, şol usul bilen içindäki soňky suw hem sykylýar.
Ondan soň açyk howada ýa-da ýörite otaglarda guramak üçin goýulan et bölekleri, soň bolsa üsti dolulygyna gaplanjak görnüşde Çemen atly sous bilen gaplanýar.
Birnäçe gün garaşdyrylanyndan soň, ýüzündäki artykmaç sousy aýrylan Kaýseri Basdyrmasy, çemen sously ýa-da sousy aýrylan ýagdaýda inçe dilimlere bölünen görnüşde satylýar.
Kaýseri basdyrmasy reňki çemen sousy bilen gaplanan mahaly gyzyl-goňur reňkde, içindäki reňk bolsa etiň ýagly bölegi sebäpli goýy gyzyl reňkde bolýar.