UEFA Ýewropa Ligasynda ýarym finalçylar belli bolup, Mançester Ýunaýted ýene-de ispan klubuna hötde gelip bilmedi.Angliýada 2-2 deňlikde tamamlanan duşuşygyň jogap oýnunda Sewilýa öz meýdançasynda Mançester Ýunaýtediň derwezesinden jogapsyz 3 pökgi girizdi.
Gollary 8-nji we 81-nji minutlarda En-Nesiri hem-de 47-nji minutda Bade geçirdi.Sewilýa topary Mançester Ýunaýtedi soňky 6 ýylda 3-nji gezek Ýewrokubok ýaryşlaryndan çykardy.
Umumylykda Mançester Ýunaýtede soňky 6 möwsümden bäri ispan klublaryndan utulyp, UEFA-nyň ýaryşlarynda nobatdaky tapgyra geçmek başardanok.Sewilýa soňky 10 ýylda 5-nji gezek ýarym finala çykyp, şolaryň 4-sinde kubogy eýeläpdi.
Ýuwentus hem öz meýdançasynda 1-0 ýeňiş gazanmagyň hözirini jogap duşuşygynda gördi. Sporting bilen myhmançylykda 1-1 hasabynda deňme-deň oýnap, 22-nji gezek Ýewrokuboklarda ýarym finala çykdy. Ýuwentus bu ugurda Real Madridden, Bawariýadan hem-de Barselonadan yza galýar.
Öz meýdançasynda 1-1 deňme-deň oýnan Baýer myhmançylykda Ýunion Sent-Žilluany uly hasap bilen, 4-1 hasabynda ýeňlişe sezewar etdi. Lewerkuzenlileriň gollaryny Diabi, Bakker, Frimpong hem-de Hložek öz atlaryna ýazdyrdylar.
Mundan 1 hepde öň Rotterdamda 1-0 asgyn gelen Roma öz meýdançasynda Feýenoordy goşmaça wagtda 4-1 hasabynda utup, ýarym finala çykdy. Romanyň gollary esasy wagtda Spinazzola (60) bilen Dibala (89), goşmaça wagtda-da El-Şaarawi (101) bilen Pellegrini (108) derwezä girizdi. Feýenoordyň adyndanam Paişao tapawutlandy (80).
Ýarym finalda Ýuwentus bilen Sewilýa, Roma bilenem Baýer duşuşar. Ýarym finalyň duşuşyklary 11-nji hem-de 18-nji maýda oýnalar.