Dünýä Kubogy 2022 hem-de Aziýa Kubogy 2023 ýaryşlarynyň saýlama tapgyrynyň oýunlary ýokary depginde dowam edýär. “H” toparçada çykyş edýän Türkmenistanyň futbol ýygyndysynyň nobatdaky 2 duşuşygy paýtagtymyzda geçiriler.
Ildeşlerimiz 14-nji noýabrda KHDR-iň, 19-njy noýabrda-da Şri Lankanyň ýygyndysyny kabul eder. 16:00-da başlanjak duşuşyklaryň ikisi hem paýtagtymyzdaky “Köpetdag” stadionynda oýnalar.KHDR bilen boljak oýna tailandly Siwakorn Pu-Udom eminlik eder.
Horwatiýaly hünärmen Ante Mişeniň tälimçiligindäki milli ýygyndymyzyň 25 oýunçydan ybarat düzümi hem belli boldy.Tälimçi Ante Mişeniň düzüme çagyran oýunçylarynyň 21-si ýurdumyzda çykyş edýän bolsa, galan 4-si daşary ýurtlarda oýnaýan futbolçylardyr.
Milli toparyň düzümine “Altyn asyrdan” 9, “Ahaldan” 7, “Köpetdagdan” 3, “Şagadamdan” 1, “Aşgabatdan” 1 futbolçy çagyryldy. Şeýle-de Özbegistanyň “Lokomotiwinden” Arslanmyrat Amanow, Gyrgyzystanyň “Dordoýyndan” Wahyt Orazsähedow, Kambojanyň “Nagaworld” toparyndan Amir Gurbani hem-de Gazagystanyň “Irtyş” klubundan Ruslan Mingazow dagy milli ýygyndyda çykyş ederler.
Ildeşlerimize bu iki jogapkärli duşuşykda uly üstünlikler arzuw edýäris.