UEFA Çempionlar Ligasynda “B” toparçada 3-nji ýeri kesgitleýän oýunda “Lans” öz meýdançasynda “Sewilýany” 2-1 hasabynda ýeňdi.Duşuşykda “Lansyň” gollaryny 63-nji minutda penaltiden Frankowski hem-de 90+6-njy minutda Fuljini derwezä girizdi. “Sewilýanyň” ýeke-täk goluny bolsa 79-njy minutda penaltiden Serhio Ramos öz adyna ýazdyrdy. Şunlukda, “Lans” bu ýeňişden soň 3-nji ýeri eýeläp, ýoluny UEFA Ýewropa Ligasynyň pleý-off tapgyryndan dowam etdirer. Ýewropa Ligasynyň soňky çempiony “Sewilýa” üçin bolsa ýaryş wagtyndan ir tamamlandy. “Sewilýa” topary 6 duşuşykda 1 ýeňiş hem gazanyp bilmedi.
Ol toparçalary ýeňişsiz tamamlan 5-nji ispan kluby bolup, ondan öň “Deportiwo” (2004/05), “Atletiko Madrid” (2009/10), “Wilýarreal” (2011/12) hem-de “Real Sosiedad” (2013/14) toparçalary ýeňişsiz tamamlapdylar.
Şeýle-de, duşuşykda “Sewilýanyň” ýeke-täk goluny penaltiden geçiren weteran oýunçy Serhio Ramos Çempionlar Ligasynda iň köp gol geçiren goragçy diýen adyň täze eýesi boldy. 17-nji goluny derwezä uran tejribeli goragçy bu ugurda Roberto Karlos hem-de Žerar Pikeden öňe saýlanmagy başardy.
Toparçadaky beýleki oýunda-da PSW bilen “Arsenal” 1-1 deňme-deň oýnady. “Arsenal” 1-nji, PSW 2-nji orny eýeläp, ýaryşy dowam etdirerler.