Çelsi iňlis klubunyň futbolçylary UEFA-nyň Super kubogy üçin oýunda Ispaniýanyň Wilýarreal klubuny penalti seriýasynda utdular. Duşuşyk Belfastdaky Uindzor Park stadionynda geçirildi.
Oýnuň esasy wagty we iki goşmaça ýarym 1:1 hasabynda tamamlandy. “Çelsiniň” düzüminde Hakim Ziýeş (27-nji minut) tapawutlandy, “Wilýarrealdan” Herard Moreno gol girizdi (73-nji minut). 119-njy minutda “Çelsiniň” düzüminde derwezeban çalşyryldy: Eduar Mendi derek meýdança Kepa Arrisabalaga çykdy. Penalti seriýasy 6:5 hasabynda londonlylaryň peýdasyna tamamlandy.
“Çelsi” UEFA-nyň Super kubogy üçin bäşinji oýna gatnaşdy we bu kubogy taryhda ikinji gezek aldy. 1998-nji ýylda iňlis topary Madridiň “Realyny” utdy (1:0). “Wilýarreal” Super kuboga ilkinji gezek dalaş etdi. Geçen möwsümde “Çelsi” Çempionlar ligasynda, “Wilýarreal” bolsa Ýewropa ligasynda ýeňiji boldy.
UEFA-nyň Super kubogy 1972-nji ýyldan bäri geçirilýär. 1997-nji ýyla çenli kubok Çempionlar ligasynyň (1992-nji ýyla çenli Ýewropa çempionlarynyň kubogy) we Kuboklaryň eýeleriniň kubogynyň (1999-njy ýylda ýatyryldy) ýeňijileriniň arasyndaky iki oýunly gapma-garşylyk görnüşinde oýnaldy. Onda ýeňiş boýunça rekord eýesi Ispaniýanyň “Barselona” we Italiýanyň “Milan” klubudyr (ikisi-de bäş gezek).