Prezident R. T. Erdogan, diplomatiýanyň ABŞ bilen Eýranyň arasyndaky dartgynlygyň ortadan aýrylmagynda uly rol oýnap biljekdigini aýtdy.
Saud Arabystanyna we Müsüre guran saparyndan gaýdyşyn uçarda metbugata beýannama beren Erdogan “Amerika bilen Eýranyň arasyndaky dartgynlygyň sebitde täze çaknyşyga we haosa sebäp bolmagynyň öňüniň alynmagy üçin elimizden geleni edýäris” diýdi.
Türkiýäniň edýän tagallasyna ünsi çeken Prezident Erdogan, ABŞ-nyň Prezdenti Donald Tramp we Eýranyň Prezidenti Mesud Pezeşkiýan bilen telefon arkarly söhbetdeşlik geçirendigini, Stambul şäherinde Daşary işler ministri Hakan Fidanyň we Eýranyň Daşary işler ministri Abbas Arakçiniň gatnaşmagynda üçtaraplaýyn duşuşyk geçirendigini ýatlatdy.
Diplomatiýa üçin giňişlik
“Eýrana harby hüjümiň guralmagyna garşydymyzy açyk-aýdyň beýan etdik”diýen Erdogan, taraplaryň gepleşik geçirmegi kabul etmekleriniň diýseň möhümdigini belledi.
Prezident Erdogan başdan geçirilýän kynçylyklaryň çaknyşyk arkaly däl eýsem gepleşik arkaly çözülmelidigine ünsi çekdi.
Erdogan aşakky derejede geçiriljek gepleşiklerde öňgidişlik edilmeginden soň liderler derejesinde gepleşik geçirilmeginiň peýdaly boljakdygyny ýatlatdy.
Sebitleýin dinamikalar
Sebitleýin dinamikalar baradaky soraga jogap beren Prezident Erdogan, Saud Arabystany bilen birlikde Aýlag ýurtlarynyň täze söweşiň başlamagyny islemeýändigini we meseläniň diplomatiýa arkaly çözülmegine goldaw berýändiklerini nygtady.
Erdogan bu meselä diňe harby nukdaý nazardan seretmegiň sebitde uly betbagtçylyga sebäp boljakdygyny belledi.
Prezident Erdogan “Sebitmizde gan we gözýaşy däl eýsem parahatçylygyň we durnuklylygyň ýola goýulmagyny we hyzmatdaşlygyň artdyrylmagyny isleýäris” diýdi.